أحمد عبدالرؤوف يتحدث عن أداء الزمالك بعد الفوز على زيسكو لدينا ثقة زيادة ورعونة
اشكر جماهير الزمالك جدًا على حضورهم وبعزي أسرة الكابتن محمد صبري للمرة التانية، والتكريم اللي حصل النهارده حاجة كبيرة ومقدّرينها كلنا.
استحوذنا على الشوط الأول بشكل كبير، وكنا نقدر نحسم الماتش من أول تلت ساعة، بس كان في شوية ثقة زيادة أو رعونة خلتنا ما ننهيش بشكل كويس.
الأداء في الشوط التاني مكنش على المستوى المطلوب، والتحولات متمتش زي ما إحنا عايزين، وكمان لعيبة المنتخب رجعوا قبل الماتش بفترة قصيرة جدًا وده عامل ضغط كبير.
ضيّعنا فرص كتير، كنا مستحوذين ومسيطرين، بس للأسف معرفناش نسجل هدف تانى.
محمود جهاد راجع بعد غياب سبع شهور، وبعد ما نزل كانت المساحات مفتوحة جدًا، وبدنيًا لسه بيرجع، ومع حصوله على إنذار كان لازم أحافظ عليه ومخسّروش، عشان كده استبدلته، ونفس الأمر كان مع أحمد شريف، التغييرات كانت لحماية اللعيبة مش لأي سبب تانيظ
بالنسبة لشيكو بانزا.. لاعيبة المنتخب انضموا للتدريبات قبل شيكو بيوم واحد بس، والوقت كان قليل جدًا إننا نشتغل على تفاصيل فردية أو نصلّح أخطاء بالشكل اللي نتمناه، وكمان كان لازم نقف جنبه بعد وفاة أخوه، وبعتلنا شهادة الوفاة، وظروفه كانت صعبة جدًا.
علاقتي بكل اللعيبة ممتازة، وبنتكلم في كل حاجة.. سواء قائمة أو تشكيل أو تغييرات.
سيف فاروق جعفر لعيب كبير ومهم، واتكلمت معاه، ودي وجهة نظر فنية… في كل الأحوال هتلاقي ناس معترضة سواء لعب أو ملعبش.
دونجا لسه مش عارف موقفه بعد الإصابة اللى اتعرض لها، وهنقيّم حالة المصابين وهنشوف هنشتغل إزاي قبل ماتش كايزر تشيفز.
📌📌 في ظروف كتير صعبة حوالينا، وهتلاقي جمهور مش راضي عن حاجات معينة، بس المهم إننا نكسب وناخد التلات نقاط، وفي حاجات أنا نفسي مش راضي عنها.
📌📌 محمد السيد استبعاده قرار إداري بسبب ملف لتجديد، وأنا مقدّر اللاعب جدًا من الناحية الفنية.
📌📌 في ماتش زيسكو مكنش عندي بديل في مركز أحمد فتوح، واشتغلنا على معالجة الثغرة اللي ظهرت من الجبهة اليسرى في الشوط التاني.
